ТЫВА ҮНДЕЗИН КУЛЬТУРАНЫҢ КАМГАЛАКЧЫЛАРЫ. ТАС-ООЛ Р.К.

Тыва улустуң аразында угулза хээлер чуруур тускай салым-чаяанныг кижилер чоруур, олар аптара-сава, орун-дөжек, аяк-сава дээш амыдыралга ажыглаар херекселдерни аңгы-аңгы өңнер-биле хээлээр. Амгы үеде аптара хээзин чуруур ус-шеверлер ховартап бар чыдар, ынчалза-даа аптара хээлерин пөске удазын-биле угулзалап даараар бодунга тускай чогаадыкчы ажылды тыпкан чаңгыс ховар мастер Тас-оол Раиса Копеековна. Ус-шеверниң даараан хээлерлиг, чинчи-шуру-биле каастаан ине хаптарын Тывада билбес кижи чок. Аптара хээлерин пөсче көжүрүп ону удазын-биле чуруп эгелээн даараныкчының ачызында тыва чоннуң үндезин культуразының бир кезээ кадагалаттынып, тускай сайзыралды алган. Апликация техниказында шылгараңгай ажылдап чоруур мастерниң боду-биле ужуражылганы бараалгаттывыс.