Чăн-чăн паттăр

Паттăр пулса çуралмаççĕ, паттăр пулса тăраççĕ. Ҫӗнӗ Шупашкарти патрульпе пост службин взвод командирӗ Сергей Ежов Чăваш Республикинче пурăнакансемшĕн чăн-чăн паттăр. Çил-тăвăл алхаснă вăхăтра Атăл сулахай çыранĕ енчен вăл 30 çынна каçарнă. – Сире, чăнах та, тав сăмахĕ каласшăн. Эсир питĕпаттăрла ĕç тунă. Сире çак паттăрлăхшăн тав тăватпăр. Чăваш Республикинче пурăнакансем Сергей Ежова тав тăваççĕ. Ытларах, паллах, вилĕмрен çăлнă 30 çын. СЕРГЕЙ ЕЖОВ: «Çил-тăвăл вăхăтĕнче ачасем, хĕрарăсем кăшкăрнине илтрĕм. Пулăшу ыйтма кимĕ патне чупса килчĕç. Каярахпа кăшт çилĕ тăхтасан вĕсене пурне те хула еннелле каçартăм». Йĕрке хуралçи каллĕ-маллĕ çичĕ-сакăр хут хутланă. Кимме тăватă-пилĕк çын лартнă. Ытлашши юрамасть, кашнинех çăлăнмалли жилетка тăхăнтартнă. Сергей Ежов хăйне паттăр тесе шутламасть. Ашшĕ-амăшĕ ачаранпах кирек мĕнле ĕçе яваплă тума хăнăхтарнă ăна. Çынна пулăшасси тĕп вырăнта уншăн. СЕРГЕЙ ЕЖОВ: «Унта хăв çинчен шутламастăн. Йĕркеллĕ пултăр тесе шутлатăн. Вĕсемшăн эпĕ яваплă». Кăçал кăна йĕрке хуралçи хӑйӗн ĕçтешӗсемпе пӗрле Атӑл ҫинче путакансене темиçе хут та çăлнă. «Ку – пирĕн тивĕç», – тет вăл.