Зміцер Вайцюшкевіч — 25 сакавіка (верш Уладзіміра Някляева)

Прэм’ера песні Змітра Вайцюшкевіча на словы Уладзіміра Някляева «25 сакавіка». 25 сакавіка да гадавіны абвяшчэння незалежнасці Беларускай Народнай Рэспублікі грамадскія кампаніі «Будзьма беларусамі!» і «Годна» прэзентавалі кліп і песню на верш Уладзіміра Някляева «25 сакавіка» ў выкананні Зміцера Вайцюшкевіча. Над відэа працавала творчае аб’яднанне «Інакш». Словы Уладзіміра Някляева. Музыка Змітра Вайцюшкевіча. 25 САКАВІКА Калі мы з табой мужчыны, Калі мы не ветры ў полі, Калі любім мы Айчыну, Як сябе – і нават болей. Дык тады скрозь нашы целы, Скрозь пакуты ўсе і болі, Між аблок чырвона-белых Пралятаюць птушкі волі. ПРЫПЕЎ: 25-га сакавіка Лёд зімовы ламае рака, І лунае, як ластаўка, 25-га сакавіка. 25-га сакавіка У руцэ - каханай рука, Напаўняе душу да крайка 25-га сакавіка. Калі мы з табой мужчыны, Калі носім гэта званне, Нам з табой няма спачыну Ні ў каханні, ні ў змаганні. У каханні да жанчыны, Што праводзіла ў дарогу, У змаганні за Айчыну, Што нам дадзеная Богам. #БНР102