Այն ժամանակ, երբ մեր երկրում լինի պարտադիր բժշկական ապահովագրություն, առանձին վճարովի դեպքերը ավելի էժան կլինեն, քան հիմա է

«Աբովյան time» պոդկաստի հեղինակ Արման Աբովյանի զրուցակիցը «Էրեբունի» ԲԿ առիթմոլոգիական ծառայության ղեկավար, բ.գ.թ., առիթմոլոգ-էլեկտրոֆիզիոլոգ Միհրան Մարտիրոսյանն է։ Սրտաբանը խոսել է եղանակային սրացումների, առողջ ապրելակերպի մասին։ Բժիշկը հիշեցնում է, որ հիվանդությունների առաջնային կանխարգելումը շատ ավելի մատչելի է, քան բուն հիվանդությունը բուժելը։ «100 տարի առաջ մենք ծնվելուց ապրիորի առողջ էինք, ունեինք կյանքի որոշակի տևողության պաշար, որովհետև պայմանները ուրիշ էին․ չկար 21-րդ դարի սթրեսը, չկար օդի, սննդի, ջրի աղտոտվածությունը, և մենք ի սկզբանե ծնվել էինք երկար ապրելու համար։ Ժամանակակից պայմաններում մենք արդեն չունենք ապրիորի տրված առողջությունը․ լինել առողջ՝ նշանակում է աշխատանք տանել դրա ուղղությամբ՝ չծխել, չչարաշահել ալկոհոլը, հետևել սննդին, սահմանափակել աղի և շաքարավազի օգտագործումը, ֆիզիկապես ակտիվ լինել և այլն»։