МАРИЙ КУМАЛТЫШ_МЕНЗЕЛ Р-Н_КАЛТАК_14 ИЮЛЬ 2024_MVI 41611

ВОЛГЫДО КУМЫЛАН МАРИЙ КУМАЛТЫШ Мензел районысо Калтак да Уял кокласе Кӱсотышто 2024 ий 14 июльышто Мэр кумалтыш эртен. Тушко Муслюм, Мензел да Актыныш районла гыч марий-влак чумыргеныт. Кумалтыште 130 утла еҥ лийын. Юмылан пуаш лопкасаҥганым, межаным да пунаным ойыреныт. Ты кумалтышым эртарымаште тӱҥ картлан ойырымо Валерий Галиевын куштылго кидше дене лопкасаҥганат, межанат иканаште гаяк могырыштым рӱзалтеныт, а пунан гын вигак шулдыржым лупшалал колтен почкалтен. Кумалаш толшо-влак (тӱрлӧ кундемла гыч лийныт гынат), ямдылалтме сомылым рӱж шуктымышт, кажныжын волгыдо кумыл, чон порылык дене толмыжо шижалтын. Пасу покшелан верланыше тиде Кӱсото пуйто шкежат волгалтын. Тыгай кугу пурлык дене ятыр ий деч вара икымше гана лектынна, – палемдыш ты Мер кумалтышлан вуйын шогышо онаеҥ Валерий Галиев. «ШНУЙ ПАМАШ» ОМЫШТО КОНЧЕН ДА ПОЧЫЛТЫН Иктаж пел меҥге тораштырак, корем лапыште, Уялын еҥже-влак у памашшинчам почыныт да «Шнуй памаш» манын лӱмденыт. Вӱдшинчам почмаште поснак ӱдыррвезе-влак ойыртемалтыныт, нунак кӱнчымӧ, пучым келыштарыме сомылым шуктеныт, шогалашлан ломаш дене верым ыштеныт. Эше кугурак сомылжо – тиде корем лапыш волашлан да вес велке (кече почешла) кӱзен каяш тошкалтышым ыштеныт. Серже тура-тура, тыге от ыште гын, волен-кӱзаш моткоч неле леиеш ыле. Нуно палемдышт: «Ожныракше тиде верыште памаш нигунамат лийын огыл. Но ала-кӧн чонжо шижын ала омеш кончен: лачак тыште вӱдшинча лийшаш...», – тыгерак пургедаш-кӱнчаш тарваненыт. А ынде теве шнуй памаш чоргыктен йога: Тура курык сер гычын талын, Памаш чоргыктен чот йога. Кугезе марий сарзе семын, Жап тӱткын ӱмбакна онча, – тыгай поэтически йорно-влак шергылтыч памаш тӱрыштӧ. «Шнуй памаш» марий кумалтыште шке рольльжым шукташ тӱҥалеш“, – палемдышт верысе чолгаеҥ-влак. Кумалтышым эртараш Марий Эл гыч пагалыме онаеҥ Василий Смирновым ӱжыныт. Тудын пелен пелешташ тыгак шогалыныт Геннадий Александров, Анатолий Делянов, Геннадий Ибрагимов, Корий Черняев (Марий Эл). Татарстан гыч Юрий Апсатаров Валерий Галиев воктен учо семын лийын да пелештен. Лайд Шемйэр (Владимир Козлов). Авторын видеожо да фотожо-влак. Йошкар-Ола – Шернур – Параньга – Уял – Параньга – Шернур – Йошкар-Ола.