23 տարի առաջ Աստանայում ստորագրվեց ԵվրԱզԷՍ–ի հիմնադրման մասին պայմանագիրը

2000 թվականի հոկտեմբերի 10-ին Աստանայում ստորագրվեց ԵվրԱզԷՍ–ի հիմնադրման մասին պայմանագիրը։ Հիմնադրման պահին Եվրասիական տնտեսական ընկերակցության անդամ էին հինգ պետություն՝ Բելառուսը, Ղազախստանը, Ղրղզստանը, Ռուսաստանն ու Տաջիկստանը: 2006 թվականի հունվարին կազմակերպությանը միացավ Ուզբեկստանը (2008 թվականի հոկտեմբերին դադարեցրեց մասնակցությունը)։ ԵվրԱզԷՍ–ին կից դիտորդի կարգավիճակ ունեին Ուկրաինան, Մոլդովան և Հայաստանը։ 2003 թվականին Եվրասիական տնտեսական ընկերակցությունը դիտորդի կարգավիճակ ստացավ ՄԱԿ-ի Գլխավոր ասամբլեայում։ 2006 թվականի օգոստոսի 16-ին Սոչիում ԵվրԱզԷս-ի անդամ պետությունների ղեկավարների հանդիպման ժամանակ որոշվեց ԵվրԱզԷՍ-ի և ԵՏՀ-ի շրջանակում երեք պետության (Բելառուս, Ղազախստան, Ռուսաստան) մաքսային միություն ստեղծել։ 2014 թվականի հոկտեմբերի 10-ին Մինսկում ստորագրվեց 2015 թվականի հունվարի 1-ից ԵվրԱզԷՍ-ի գործունեությունը դադարեցնելու մասին պայմանագիրը, որի փոխարեն ստեղծվեց ԵԱՏՄ-ն։