«Глазкарысь завод»: льнозаводысен уранозь

1934-тӥ арын толшоре-тулыспалэ Москваын коммунистъёслэн всесоюзной партизылэн XVII ӧтчамаз СССР-ын 12 выль льнокомбинатъёс пуктон сярысь ялӥзы. Ӧтчамлэсь пуктэтсэ быдэсъяса, Горький шаерысь, кытчы соку Удмуртия пыре вал, исполкомлэн президиумез Глазкарын но Котельничын етӥнлэсь черсон но куон комбинатъёс пуктон сярысь пумкылъян кутэ. Но 1934-тӥ арын 12-тӥ инвожое нырысетӥ комбинатэз ӵапак Глазкарын пуктыны кулэ шуыса пумкылъян кутэмын вал. Карын Удмуртилэн уйпалаз тужгес бадӟым предприятиез ӝутыны малпазы – льнокомбинат но ньыль фабрикаос – согъян (чесальной), черсон, куиськон но 750 станокъёсын бельно-отделочной. Комбинатын тямыс сюрс адями ужаны кулэ вал.