Nəriman Tolışi - Bı Tolışə bandonədə

İfo kardə: Ataxan Əbilov BI TOLIŞƏ BANDONƏDƏ Ha dustım boy bə seyr beşi Bı Tolışə bandonədə. Vəyşti bıvınd deştə çaşi, Bı Tolışə bandonədə. Honi ovon bədəy biyəy, Ki peşoməy, sa sor jiyəy. Pəydo bəkaj çiçı piyəy? Bı Tolışə bandonədə. Boy bə hıri, boy bə avə, Peyo saru diyə bıkə. Kəon peşən bə haləsə, Bı Tolışə bandonədə. Dimbədimin çəmə bandon— Im Kəmərku, əv Səvalon— Iye vişə, ruy, kuy zıvon, Bı Tolışə bandonədə. Bəni “yolə dəbyovniyə”— Okuşyə ni çıvrəy kiyə. Ariyon ve asp tojniyə, Bı Tolışə bandonədə. Boy bəçəmə vişon edyəs— Uğ, şımşorə, ambur, uləs— Bəvindej sa nodirə rəs, Bı Tolışə bandonədə. Har halədə tarıx hıtdə, Okə, diyəkə çiçon votdə. Bızzəyədə, Bıləbanddə, Bı Tolışə bandonədə. Im Xəlifon, ım Osnəğon, Imən çəmə Canqəmiyon... Çı Babəki rizon iyon— Bı Tolışə bandonədə. Zuyən pəye, zındəjəni, Çı Hurmuzdi, Əhriməni, Değe dəvom bıkə dini, Bı Tolışə bandonədə. Iyo yolbə şir Şaverən, Bilə Məmməd, ə Boykəğən. Çı Haciəğə moə vətən, Bı Tolışə bandonədə. Hejo ğal bə Şindoni sə. Isə hıtə əv tamijə. Çəy şimşiye avuəçəkə, Bı Tolışə bandonədə. “Sarkinə” həm Ğuzə ğaləy, Əçəy vırə Orandi səy. Kuhon həmə hıri lonəy, Bı Tolışə bandonədə. Dınyodə tək tolşi xuni, Tərkibədə puçə qen ni. Xalqi nəsli sofi qin ni, Bı Tolışə bandonədə. Ğəssəm bıbu bə həşi çaş, Veye çəmə tarixi yaş. Sırron niyon, tı o bıkoj, Bı Tolışə bandonədə. Nərimanim, dıldəm ni ğəm, Bı bumədə jiyə mom, pəm. Çı çok az bə dınyo oməm Bı Tolışə bandonədə. Nəriman Tolışi #atiştv #tolışon #tolışəzıvon