Michelin Guide-ի ընտրությունը ԱՄՆ-ում - արցախյան «Ժենգյալով հաց»

Գլենդելի կենտրոնում գտնվող Բրոդվեյ, 318 E հասցեում գտնվող արցախյան «Ժենգյալով հաց» ռեստորանը դարձել է սիրված վայր ոչ միայն տեղի հայերի, այլև այլազգիների համար: Կարճ ժամանակում ռեստորանը հանրաճանաչություն ձեռք բերեց նաև ԱՄՆ-ում ճանապարհորդող զբոսաշրջիկների շրջանում: Տարբեր նահանգների բնակիչներ գալիս են այստեղ վայելելու արցախյան հոտն ու համը։ Ամեն ինչ սկսվեց 2015 թվականին, երբ Վրեժ Օսիպյանն առաջին անգամ եկավ ԱՄՆ և շուկան ուսումնասիրելուց հետո համոզվեց, որ իր երևանյան բիզնեսը կծաղկի նաև Գլենդելում: Երկար փնտրտուքներից հետո Վրեժը 2019 թվականին այս քաղաքում բիզնեսի համար հարմար տարածք գտավ և սկսեց վերանորոգել այն։ Մինչ այդ նա նույն բիզնեսն էր հիմնել նաև Մոսկվայում։ Անցյալ տարի «Ժենգյալով հաց» ռեստորանն ընդգրկվել էր 1900 թվականից լույս տեսնող ամենահայտնի Michelin Guide-ում։ Վրեժն ընդգծում է, որ իր հաստատությունը ԱՄՆ-ում նման ուշադրության արժանացած առաջին և միակ հայկական ռեստորանն է, որն ընդգրկված է նաև Michelin Guide-ում: