“Саякаттаган“ чачпак, 200 түлкүнүн бучкагынан тигилген ичик

Салттуу билимдердин ээси, уз, “Аталар изи“ коомдук фондунун жетекчиси Асел Калканова 30 жылга чукул мезгилден бери кыргыздын илгерки кийимдерин, зер буюмдарды жана кыргыздын тиричиликте пайдаланган оокаттарын чогултуп, сактап, изилдеп келет. Калкановада XIX-XX кылымдарга таандык, азыр унутта калып бараткан уникалдуу зер буюмдар, кийимдер сакталуу. Ал Sputnik Кыргызстанга өзүндөгү буюмдар, алардын тарых-таржымалы тууралуу кызыктуу маек куруп берди. Уз колундагы ар бир буюмга аспиеттеп мамиле кылып, аларды кайдан, кимден, качан жана кантип алганына чейин эстеди. Мисалы, бизге көрсөтүп берген сөйкө желбирөөчтүн тагдыры кудум эле адамдардыкына окшош. Көлдөгү ээси (аял киши) каза тапкандан кийин кандайдыр бир жол менен Чоң-Алайдагы байбичелердин колуна тийип калат. Кийин көлдүк эненин урпактары сүрүштүрүп отуруп, атайы ат арытып барып, киши салып жатып, күмүш желбирөөчтү кайта өздөрүнө алган экен. “Аталар изинин“ жетекчиси сактап жүргөн аялдардын шөкөт буюмдарын: ак дана мончокторду, маржан шуруларды, чачпакты, сөйкө желбирөөчтү көрө алдык. Андан сырткары, бул жерде азыр эл арасында сейрек кездешкен түлкүнүн бучкактарынан жасалган ичик, төө чепкен бар. Айтмакчы, ал ичик 200 түлкүнүн бучкагынан жасалыптыр. Улуттук буюмдардын уңгусун улап, “жашоосун узартууга“ кам уруп жүргөн Калканова кийинки муундардын бул баалуулуктарга көп кызыкпагандыгына тынчсызданарын айтты.