Баланын талмага кабылганын алгач ата-эне байкабайт. Эпилептологдун маеги

Акыркы учурда коомдо ар кандай оорулар менен катар талма оорусу да көп кездешип жатканын адистер эскертет. Эпилепсиянын белгилери, себептери да айырмаланарын невролог-эпилептолог Максат Батыров айтып берди. Учурда эпилептологго республиканын аймактарынан балдардан чоң кишилерге чейин кайрылып келет. Айрым бейтаптар молдо, бакшыларга барып убакыттан уттуруп коёт дейт дарыгер. Талма — негизинен генетикалык оору. Тукум кууйт. Эненин аз кандуулугу, кош бойлуу кезде ар түрдүү жугуштуу оорулар менен оорушу, төрөт маалындагы кыйынчылыктар баланын мээсин жабыркатат. Андан талма жана башка неврологиялык оорулар келип чыгышы мүмкүн. Негизинен оору 16 жашка чейинки куракта билинет. Бирок кийин да ойгонушу мүмкүн. “Эпилепсиянын симптомдору ар кандай болгондой эле дарылоо ыкмалары да өзгөчөлөнөт. Ошондуктан алгач эпилепсиянын кайсы түрү экенин аныктап алуу керек. Анын алгачкы белгилерин ата-энелер байкабай калышы мүмкүн. Бала алгач бир чекитти тиктеп туруп калып, колу чочуп силкинип, сүйлөгөнү бузулат. Эч кандай белги бербей эле акыл-эси артта кала бериши ыктымал. Убагында дарылаш керек. Эл ичинде бала эсин жоготуп жатып калмайынча эле талма катары карабаган түшүнүк бар“, — деди Батыров. Батыровдун айтымында, эпилепсия оорусунун 70 пайызга чейинкисин сакайтууга болот. Ошондуктан бакшыларга ишенип убакытты өткөрбөй, баланы дароо дарыгерге алып келүү керек.