Янғынға шаһит булған осраҡта нисек эш итергә?

Башҡортостанға йәнә эҫе көндәр килде – элеккесә шәхси биләмәләрҙә лә сүп-сар яндырыу тыйыла. Урманға йөрөү сикләнгән. Республикала янғын хәүефһеҙлеге буйынса махсус тәртип иғлан ителде. Төбәктә тәүлек эсендә янғындар теркәлмәгән. 2024 йылда янғын хәүефе осоро башланғандан алып 17 гектар майҙанда бөтәһе 8 урман янғыны сығанағы асыҡланған, былтыр был һан 98-гә күберәк булған. Янғынға юл ҡуймау һәм хәүефһеҙлек саралары тураһында Башҡортостан менән идара итеү үҙәгенән БЮТ телеканалының «Сәләм» тапшырыуына тура элемтә барышында Рәсәй Ғәҙәттән тыш хәлдәр министрлығының төбәк буйынса баш идаралығы белгесе Илдус Назаров һөйләне. Ғәҙәттән тыш хәлдәр министрлығы хеҙмәткәрҙәре «Урман һаҡсыһы» системаһы ярҙамында биләмәләрҙе тәүлек әйләнәһенә күҙәтә – Башҡортостанда радиусы 35 километрға еткән 12 комплекс ҡуйылған. Бынан тыш, белгестәр махсус самолет, күп маҡсатлы КА-32 вертолеты ярҙамында авиация патруле алып бара, министрлыҡтың пилотһыҙ осоу аппараттары ҡулланыла. Хәлде шулай уҡ йыһан мониторингы аша ла күҙәтәләр. Янғынға шаһит булған осраҡта нисек эш итергә кәрәклеге тураһында тулыраҡ - эфир яҙмаһында.