“СЫТЫГАН“ күөлгэ муҥха

Сэтинньи 15 күнүгэр “Сытыган“ күөлүгэр күүтүүлээх улахан муҥха тэрилиннэ.Уопсайа 23 массыына көлөлөөх 85 киһи кытынна. Дьаһалта үлэһиттэрэ ыалдьыттары күөс өрөн итии мининэн, сылаас чэйинэн көрүстүлэр. Ил Түмэн депутата биир дойдулаахпыт Алена Атласова олоҕор бастакы муҥхата буолан биэрдэ. “УпрДорВилюй“ дириэктэрэ Николай Андреев 4 анньыыһыттаах кэллэ. Улуус дьаһалтатын үлэһиттэрэ үс массыынанан ыалдьыттаатылар. Дьон Афанасий Осипов хартыынатын сиһилии үөрэтэн, образтарын үллэстэн, түүлээх таҥастары булан, кэтэн кэлбиттэрэ сөхтөрдө. Тоҕуоруһа мустан алгыс тыллаах байанайы айах тутуу сиэрин-туомун көрдүбүт, ыалдьыттар баҕа санаалаах тылларын иһиттибит. Үлэ сылынан туруу үлэһит дьоммут махтал суруктары туттулар: Степан Пахомов, Петр Платонов, Алексей Алексеев. Тэрээһиммитигэр күммүт туран биэрдэ, көп хаар түһэн ураты эйгэни үөскэттэ. Оскуола оҕолоро үгэһи үөрэтэ, өбүгэ ситимин ситэрэ кэлбиттэрэ тэрээһиммит сүрүн сыалын толордо. Муҥха хаамыыта дьон сэргэх кэпсэтиитин доҕуһуолугар, өрө көтөҕүллүүлээх “һуу“ хаһыы ортотугар, биир тыынынан ааста. Муҥха ийэтэ кэлэрэ, тыҥааһыннаах, түмүктүүр түгэммит тиийэн кэлбитин билбэккэ да хааллыбыт. Күөх боллох көмүс хатырыктааҕыттан күндүлээтэ, байанайбыт мичик гынна. Күөлбүт биирдии солуур инчэҕэйинэн өлүүлээтэ. Сибиэһэй салгыҥҥа дуоһуйа сынньаммыт бар дьоммут Афанасий Осипов улуу хартыынатын тыыннааҕымсытан миэстэлэрин буллулар, хаартыскаҕа түстүлэр, видеоҕа уһулуннулар. Тэрээһиммит өрө көтөҕүллүүлээх Уруй-Айхал хаһыынан, собо амсайар дьоро киэһэтэ үүммүт үөрүүтүнэн түмүктэннэ.Тэрийсибит, көмөлөспүт, ыалдьыт буолбут дьоммутугар махтал!