Үтүө үгэс үйэлэри уҥуордуур: Мэҥэ Хаҥалас улууһугар култуура уонна спорт эстафетата

Быйыл Мэҥэ Хаҥалас улууһугар 66-с сылын үгэс буолбут В.К.Степанов аатынан култуура уонна спорт эстафетата “Дойдубут туһугар бары бииргэ!” диэн девизтээх нэһилиэктэринэн үс бөлөҕүнэн арахсан ыытылынна. интернет таһаарыы устар бөлөҕө Дьаҥхаады нэһилиэгин кэнсиэрин уонна бу фестиваль хайдах ыытылларын туһунан киинэ оҥордо. Салгыы ВИДЕО-ҕа көрүҥ. Эстафета үс бөлөххө арахсан ыытыллар. Инники күөҥҥэ сылдьар нэһилиэктэр хас эмэ сыл устата таһымнарын ыһыктыбакка тута сылдьаллар. Улахан бөлөхтөрго быйылгы фестивальга Дьаҥхаады нэһилиэгэ кыайыы өрөгөйдөннө. Уус-уран кэнсиэр сылын аайы тахсар ирдэбилинэн ыытыллар. Оһуохай эстафета балаһыанньатыгар өрүү ирдэбил быһыытынан киирэр. Нэһилиэктэр ону таһынан бэйэ икки ардыларыгар спорт хас да көрүҥнэригэр күөн көрсөллөр. Бу фестивальга уус-уран оҥоһуктар быыстапкаларыгар төрүт үгэс көрүҥнэригэр үлэ күүскэ салгыы баран иһэр. Удьурхайтан, тимиртэн (хомус, саха быһахтара) оҥоһуктарга, итиэннэ саха төрүт иһиттэригэр, кыл, сиэл оҥоһуктарга болҕомто күүстээхтик ууруллар. Саха төрүт таҥаһыгар үгэһи, каноннары тутуһан толору комплект таҥастары тигии ирдэбилтэн туораабат. Саха таҥастарын толору комплектарын кэтэн, куорат сүрүн уулуссаларынан парааттаан хаамыы үгэскэ кубулуйда. Онно Мэҥэ Хаҥалас олохтоохторо көхтөөхтүк кыттаннар биһирэбили ылан, инники күөҥҥэ сылдьаллара эстафета сабыдыалынан буолар. Үтүө үгэс курдук култуура уонна спорт эстафетата инники ситимин сүтэрбэккэ, салгыы дьон-сэргэ, нэһилиэнньэ өрө көтөҕүллүүтүн туһугар сайдан истин. Кэлэр кэнэҕэски ыччакка, көлүөнэттэн көлүөнэҕэ бэриллэ турдун!