Минзәрә Аҡҡошова Әсә хаты, Әсә йөрәге 2018

Минзәрә Аҡҡошова Ейәнсура районы Иҙәш ауылында тыуып үҫкән. Ырымбур өлкәһенең Орск ҡалаһында ғүмер кисерә. “Бала саҡтан күңелемдә йыр-моңға һөйөү йөрөтәм. Ҡырҡлаған йыр авторымын. Шиғырҙарыма яҙылған йырҙарымды Нәсимә менән Азамат Тимеровтар, Зәлиә менән Фаил Йортбәковтар, Айҙар Ғәлимов, Ғәзим Ильясов, Нәфҡәт Ниғмәтуллин, Зөлфиә һәм Жәүит Шакировтар, Вилдан Яруллин, Ризуан Хакимов һәм башҡа бик күп йырсылар башҡара. Башҡортостан Республикаһының атҡаҙанған мәҙәниәт хеҙмәткәремен. 2016 йылда “Аҡҡош моңо” исемле китабым сыҡты”, – тип яҙа ул үҙе хаҡында. Ул бәйгегә тәҡдим иткән “Әсә хаты“ бөгөн эш эҙләп ситкән киткән башҡорт егеттәренә арнала. Шиғырға һалынған бушап ҡалған ауылдарыбыҙ, етемһерәп ятҡан еребеҙ, киләсәгебеҙ хаҡында әсенеүле уйҙар ысынлап та көн ҡаҙағына һуға бит, тыңлап ҡарағыҙ әле!