НЕДЕЛЯ ЖЕН-МИРОНОСИЦ.

Тропари Недели жен-мироносиц: Благообра́зный Ио́сиф с дре́ва снем Пречи́стое Твое́ те́ло, плащани́цею чи́стою обви́в, и благоуха́ньми во гро́бе но́ве закры́в положи́; но тридне́вен воскре́сл еси́, Го́споди, подая́й ми́рови ве́лию ми́лость. Мироно́сицам жена́м при гро́бе предста́в А́нгел, вопия́ше: ми́ра ме́ртвым суть прили́чна, Христо́с же истле́ния яви́ся чуждь. Но возопи́йте: воскре́се Госпо́дь, подая́й ми́рови ве́лию ми́лость. Кондак Недели жен-мироносиц: Ра́доватися мироно́сицам повеле́л еси́, плачь прама́тере Е́вы утоли́л еси́ воскресе́нием Твои́м, Христе́ Бо́же, апо́столом же Твои́м пропове́дати повеле́л еси́: Спас воскре́се от гро́ба. Величание: Велича́ем вас святы́я мироно́сицы, и чтим святу́ю па́мять ва́шу: вы бо мо́лите о нас Христа́ Бо́га на́шего.