«Добровидение» фестивале Чăваш Енрен «Уяв» хутшăнать

Çĕртме уйăхĕн 9-мĕшĕнче Питĕр хулинче «Добровидение» фестиваль уçăлать. Кăçалхипе вăл 8-мĕш хут иртет. Унта «Голос» проект çĕнтерӳçисем Петр Захаров, Фотий иеромонах, «Янра, юратнă хут купăс» телекăларăмра пулнă паллă купăсçăсем хутшăнаççĕ. Фестивале Чăваш Енрен «Уяв» фольклор ансамблĕ те куракансене хăй пултарулăхĕпе тĕлĕнтерме хатĕрленет. «Уяв» фольклор ансамбльне çĕршывра кăна мар, унăн тулашĕнче те аван пĕлеççĕ. 2020-мĕш çулта ĕçне кура вĕсем «Раççей халăх пултарулăхĕн тава тивĕçлĕ ушкăнĕ» ята тивĕçнĕ. Регион тулашĕнчи чăвашсем йышлă пурăнакан çĕре те тăтăшах тухса çӳреççĕ. ЗОЯ ВАСИЛЬЕВА: “20 çул çӳренĕ вăхăтра таçта та кайса куртăмăр. Темĕнле фестивальте те пултăмăр. Халь пире çав тери пысăк фестиваль кĕтет. «Доброведени» тесе калатпăр. Вăл пирĕн Питĕр хулинче иртет. Эпир çав фестивале хавасланса кĕтетпĕр. Тĕрлĕ юрăсене, ташăсене хăватлăн васкаса вĕренетпĕр. Манса кайнисене аса илетпĕр“. Хальхинче вĕсем Питĕрте пурăнакансене, унта пухăнакан хăнасене илемлĕ чăваш тумĕпе, халăх фольклорĕпе паллаштарасшăн. ЗИНАИДА КОЗЛОВА: «Фестиваль, пĕрле хутшăнса хамăр тăван çĕршыва мухтаса. Эпир хамăра хамăр намăса яманнине шанатпăр“.