Қазақ Хандығы Алтын тақ

Көрнекті жазушы Ілияс Есенберлиннің «Көшпенділер» трилогиясының бірінші томы – «Алмас қылыш» романының желісі бойынша түсірілген «Қазақ Хандығы» кинодилогиясы – көшпелі қазақ тайпаларының басын қосқан Қазақ Ордасының алғашқы хандары – Керей мен Жәнібек сұлтандардың билік құрған кезеңін қамтиды. XV ғасырдың ортасы. Әлем әміршісі Шыңғыс хан империясының қирандысының орнына бірнеше ұлыстар бой көтерген кез. 1465 жылы, сондай ұлыстардың бірі – «Ақ Орда» мемлекетінің тікелей мирасқоры, Орыс хан ұрпақтары Керей мен Жәнібек сұлтандар Көк Орда билеушісі Әбілқайыр Шайбаниге наразы көшпелі тайпаларды бір тудың астына жиып, Ақ Орданың қара шаңырағы – «Қазақ Хандығын» құрды.Алайда азаттық жолы тар жол, тайғақ кешусіз болған ба? Кезінде Орыс хан тағын күшпен иеленіп, 40 жыл бойы жеке дара билік құрған Әбілқайыр хан Әмір Темір ұрпақтары – Мәуеренаһр әмірлерінің қолдауымен ата жауы Керей мен Жәнібекке қарсы жойқын жорыққа аттанады. Бірақ бұл жорық қайырсыз болып Әбілқайыр хан қаза табады. Осылайша Тәңірі алқаған қазақтар Шайбан тұқымдарының қол астындағы астана шаһар – Сығанақ пен Алтын тақты қантөгіссіз қайтарып алады.