Нинкöм, нинкöмок, виль да сера пытшынок…

Кудымкарскöй районiсь Березовка посадiсь олiсь Евдокия Ефимовна Таскаева нинкöммез кыйöм понда заптö нин. Медбы нинöн вöлi кокнитжык уджавны, качсö кöтöтö шоныт ваын. Кыкьямысдас годся инь понда этö быдлунся удж. Кыдз ачыс шуö, аслас олан коста сiя кыйис тысячася унажык гоз. А медодзза нинкöммесö кыйис эшö сизимöт классын велöтчикö. Сёрöнжык сылöн нинкöммес паськалiсö омöн страна пасьта. Кыдз шуö Евдокия Ефимовна, кытшöмкö торья секреттэз нинкöм кыйöмын сылöн абу. Нинсö весöтö пуртöн и кутчисьö кыйны. Куимдас гöгöр минута бöртi мастер киэз увтiсь петiс быдса гоз. Инька шуö, мый эшö война годдэзö нинкöммезнас ветлöтiс быдсöн посадыс. Öнi жö ыджыт спросöн пользуйтчöны унажыксö декоративнöй нинкöммез. Ну а новйöм понда нинкöммез вылö заказсö керöны вöралiссез да тшакьялiссез. Нiя гожумöн да арöн вöрас ветлöтöны кыйöм кöмкöтöн. Кöть öнi шоча ни кинöс адззылан быдлунся оланiсь нинкöммезнас, а вот банiсь керöм дозмуккес öнöдз вежöны отир оланын öнняся аналоггесö. Öнöдз быд керкуын эмöсь туиссэз да мöдiк доззэз, кöднö отирыс видзöны тшак да ягöд öктiкö. А Евдокия Ефимовна быдöс прос кадсö сетö кöмкöт кыйöмлö. Öнi лöсьöтö декоративнöй нинкöммезлiсь виль партия. Кыдз шуö мастер, öнöдз краевöй столицаын олiссез локтöны сы дынö нинкöммезла, медбы ны отсöтöн керны югытжыкöн да сöстöмжыкöн ассиныс оланiннысö.