Айгөл Сәғитова “Әсә бәхете“

Айгөл Сәғитова (Теләүморатова) Ейәнсура районы Бикбау ауылында тыуып үҫә. Күрше ауылда урта мәктәпте тамамлағандан һуң, Бикбау ауылында өс йыл мәктәптә эшләй. 1995 йылда БДУ-ға уҡырға инә. Юғары уҡыу йортон ҡыҙыл дипломға тамамлағас, аспирантурала тел ғилемен өйрәнә. Йәш белгесте дөйөм һәм башҡорт тел ғилеме кафедраһына эшкә саҡыралар. Ғәрәп теле буйынса лекциялар уҡый, практик дәрестәр алып бара. Лингвокультурология йүнәлеше буйынса кандидатлыҡ диссертацияһын яҡлай. Бөгөнгө көндә Айгөл Ғәни ҡыҙы башҡорт тел ғилеме өлкәһендә эшләүен дауам итә, тормош иптәше менән дүрт бала тәрбиәләйҙәр. Әсә бәхете Хоҙай биргән һәр көнөмдөң Балҡып торған нуры бит һеҙ. Мөхәббәткә нигеҙләнеп Ҡорған тормош ҡото бит һеҙ! Ата-баба рухы һеңгән, Башҡортомдоң ҡаны бит һеҙ. Тыуған ерҙе телле иткән Милләтемдең көсө лә һеҙ! Яндарымда дүрт йондоҙом – Мөлдөрәмә Әсә бәхете. Һөйөү менән һуғарылған, Киләсәге уның өмөтлө!