Такер Карлсон Москвадагы “Киев“ станциясы жөнүндө айтып берди

Америкалык журналист Такер Карлсон бул сапар Москва шаарындагы метронун “Киев“ станциясы тууралуу видео тартып, анын көрүнүшүнө суктанып, “шок“ болгонун айткан. “Өзөктүк куралы бар май куюучу станция деп айтылып жүргөн Россия сындуу өлкөдө карапайым эл күн сайын жумушуна, үйүнө каттаган метро станция бар. Ал кандайча жана эмнеси менен биздин өлкөнүкүнөн жакшыраак?“ — деген да видео менен көрсөтүп берген. Журналист станциянын 70 жыл илгери Иосиф Сталиндин бийлиги учурунда курулганын белгилеген. “Бул Сталинди көкөлөтүү эмес. Бул азыркы президент Владимир Путинди да асмандатуу эмес, балким, ал силерге да жакпашы мүмкүн. Бирок бул биз көргөн, тагыраагы, буга чейин көрө элек реалдуу нерселерди жокко чыгара албайт“, — деген Карлсон. Журналист буга чейин Дубайдагы саммитте Москва шаарынын архитектурасы менен тамак-ашы, коопсуздугу, тазалыгы боюнча таасирленген пикирин билдирген. Февралдын башында Карлсон биринчи ирет Москвага келген. Россия лидери Владимир Путинден эки сааттык интервью жасаган. Журналист америкалыктар Россия менен Украинада эмне болуп жатканын такыр эле билбегендиктен улам Путин менен маектешүүнү чечкенин түшүндүргөн. Такер Карлсон — Америкадагы рейтинги жогору болгон саясий баяндамачы. 54 жашта. 2016-жылдан тарта 2023-жылдын апрель айына чейин Fox News телеканалында саясий ток-шоу алып барган. Мурда The Daily Caller жаңылыктар сайтынын автору жана шеф-редактору да болуп иштеген.