Республиканскай лицей-интернат: профтур, тьюторство

Өрөспүүбүлүкэтээҕи лицей-интернатка ыччаты саха тылын өрө тутан үөрэтэллэр-такайаллар. Оҕо төрөөбүт тылынан көҥүллүк саҥарарын, ааҕарын-суруйарын кыра эрдэҕиттэн хааччыйарга дьулуһаллар. Эдэр учууталлар бу үтүө үгэһи кэспэккэ, күннэтэ салгыыллар. Лицей эдэр үлэһиттэрэ: тьютор Михаил Филиппов, английскай тыл учуутала Виктор Потапов уонна история, обществознание учуутала Самаана Бурцева, төһө да хайысхалара тус-туспа буоллар, үөрэх хаамыытыгар саха тылын чорботон билии иҥэрэллэр. Тьютор Михаил Филиппов үөрэнээччилэри идэҕэ туһаайар үлэтин былырыыҥҥыттан ситиһиилээхтик саҕалаабыт. Кини көмөтүнэн, үрдүкү кылаас оҕолоро дойду хас да улахан университетыгар сырыттылар, үөрэх программатын кытта сиһилии билистилэр, инники идэни талыыга олук ууруннулар. Онтон англия тылын уһуйар Виктор Потапов лицейгэ үлэлээбитэ тоҕус сыл буолбут. Кини Шекспир тылын кытта саха тылын дьүөрэлээн, төһөлөөх интэриэһинэй уруогу ыыппыта буолуой? Күннэтэ сөбүлүүр үлэтигэр бары кыаҕын уурар Виктор лицей эдэр кэскиллээх учууталларыттан биирдэстэрэ. История, обществознание учуутала Самаана Бурцева кынаттаабыт лицейигэр үлэлии кэлбитэ биир сыл буолла. Эдэр педагог предметин таһынан эбии кылаас салайааччыта. Хас биирдии оҕо иһин эппиэтинэс, төрөппүтү кытта үлэ, ону таһынан кылаас бүппэт түбүктээх үлэтэ Самаананы чаҕыппат, төттөрүтүн үлэни таптыырга төрүөт буолар. Учуутал уонна аҕа сүбэһит сылыгар эдэр учууталлар интэриэһинэй бырайыактары олоххо киллэрэр санаалаахтар. устар бөлөҕө өрөспүүбүлүкэтээҕи лицей-интернат учууталларын кытта көрүстэ.