Сæрмагонд æфсæддон операцийы Фарныхъæуы цæрджытæй чи фæмард, уыдоны номыл скодтой сæрмагонд мадзал

Къаммæ æркæсгæйæ дæр йæ миддуне бæрæг дары. Æппынæдзух худгæбыл, хиуæттыл æмæ сывæллæттыл æнувыд. Ахæм æй бахъуыды кæндзысты Гагиаты Тамерланы. Тамик — бæрзонд, хæрзконд, зæрдæхæлар лæппу. Æмæ ныфсхаст, тынг ныфсхаст. Æппындæр ницæмæй тарст, йæ ныхас ницы хуызы фæивтаид. Йæ зæрдæ йæм куыд дзырдта, афтæ цард. Сæрмагонд æфсæддон операцийы бынаты йæхи æхсарджынæй равдыста. Йæ хъæбатырдзинады ’руаджы аирвæзын кодта цъысымы бахауæг 10 адæймаджы. Кæстæр сержант Гагиаты Тамерлан фæмард 2022-æм азы 15-æм майы. Йæ æхсардзинад æмæ удуæлдайдзинады тыххæй йæ амæлæты фæстæ хорзæхгонд æрцыд Лæгдзинады орденæй. Тамерланы хуызисты фарсмæ — Кокайты Феликсы портрет. Уый фæмард 16-æм майы æфсæддон хæслæвæрды рæстæг. Уарзон фырт æмæ æфсымæр. Фек — афтæ йæ фæлмæнæй хуыдтой хъæубæстæ. Дзырддзæугæ æмæ æмбалджын. Кокайты бирæсывæллонджын бинонты йæ бабайæн хъулон кæстæр уыд. Фарныхъæуы цæрджытæ ссардтой се ’мхъæуккаг хъайтарты нæмттæ. Мысæн мадзал арæзт æрцыд Рахизфарсы районы “Сылгоймæгты Советы“ хъæппæрисæй. Фарныхъæуы администраци дæр сæ фарсмæ балæууыд. Сценæйыл сæ арæхстдзинад равдыстой сфæлдыстадон къордтæ æмæ скъоладзаутæ. Уыдон бакастысты патриотон æмдзæвгæтæ, бæстонæй радзырдтой Сæрмагонд æфсæддон операцийы æдзард архайджыты тыххæй. Цæгат Ирыстоны Намысы хыгъды æнустæм кæй нæмттæ фыст æрцыдысты, уыцы хъæбатыртæ.