Ինչպես են Հայաստանում պայքարում նորածինների կյանքի համար

Սա ԵՊԲՀ «Մուրացան» համալսարանական հիվանդանոցի Մանկական և նորածնային վերակենդանացման կլինիկան է։ Հենց այս բուժկենտրոնի բժիշկներն են 0-28 օրական ծանր ու ծայրահեղ ծանր վիճակում գտնվող նորածիններին տեղափոխում հանրապետության բոլոր մարզերից։ Անգամ երևանյան մի բուժկենտրոնից մյուսը 0-28 օրական նորածնի տեղափոխումը կրկին այս կլինիկայի բժիշկներն են կատարում։ Բժշկուհի Մերի Խաչատրյանն է․ օրեր առաջ կանչով Հրազդանի ծննդատուն մեկնելիս ռեանիմոբիլը վթարի էր ենթարկվել։ Վարորդը կոտրվածքներով տեղափոխվել էր հիվանդանոց, բուժքույրն ու բժշկուհին քաղաքացիներից մեկի մեքենայով շտապել էին կանչի վայր։ Բժշկուհին հրաժարվել էր բուժօգնությունից, ծայրահեղ ծանր վիճակում նորածնին ինտուբացրել, միայն դրանից հետո ինքն էլ էր բուժօգնության դիմել։ Ամառ թե ձմեռ, եղանակային ամենաանբարենպաստ պայմաններում անգամ կլինիկայի բժիշկներն ամենահեռավոր բնակավայրեր են հասնում։ Տարեկան մարզային ծննդատներից 600-ից ավելի նորածին է տեղափոխվում։ Նրանց մոտ 96 տոկոսը փրկվում է։ Աշխատանքը ծանր է, սթրեսային, բայց հենց փրկված կյանքերն են պայքարելու, շարունակելու ուժ տալիս։