Покаянная молитва ко Господу во дни смуты

Го́споди, Бо́же Вседержи́телю, при́зри на на́с, гре́шных и недосто́йных ча́д Твои́х, согреши́вших пред Тобо́ю, прогне́вавших бла́гость Твою́, навлекших гне́в Тво́й пра́ведный на ны́, па́дших во глубину́ грехо́вную. Ты́ зри́ши, Го́споди, не́мощь и ско́рбь душе́вную, ве́си растле́ние умо́в и серде́ц на́ших, оскуде́ние ве́ры, отступле́ние от за́поведей Твои́х, умноже́ние нестрое́ний семе́йных, разъединения и раздо́ры церко́вныя, Ты́ зри́ши печа́ли и ско́рби на́ша, от боле́зней, гла́дов и междоусо́бныя бра́ни происходящия. Но, Премилосе́рдый и Человеколюби́вый Го́споди, вразуми́, наста́ви и поми́луй на́с, недосто́йных. Испра́ви жи́знь на́шу грехо́вную, утоли́ раздо́ры и нестрое́ния, собери́ расточе́нныя, соедини́ разсе́янныя, пода́ждь ми́р стране́ на́шей и изба́ви ю́ от тя́жких бе́д и несча́стий. Всесвяты́й Влады́ко, просвети́ ра́зум на́ш све́том уче́ния Ева́нгельскаго, возгре́й сердца́ на́ша теплото́ю благода́ти Твоея́ и напра́ви я́ к де́ланию за́поведей Твои́х, да просла́вится в на́с всесвято́е и пресла́вное и́мя Твое́, Отца́ и Сы́на и Свята́го Ду́ха, ны́не и во ве́ки веко́в. Ами́нь.