ПОЛОЖЕНИЕ ЧЕСТНОЙ РИЗЫ ПРЕСВЯТОЙ БОГОРОДИЦЫ ВО ВЛАХЕРНЕ.

#Православие, #Христианство, #РизаПресвятойБогородицы, #ПоложениеРизыПресвятойБогородицы, #Ризоположение, #ПоложениечестнойРизыПресвятойБогородицывоВлахерне Тропарь: Богоро́дице Присноде́во, челове́ков покро́ве, ри́зу и по́яс пречи́стаго Твоего́ телесе́, держа́вное гра́ду Твоему́ обложе́ние дарова́ла еси́, безсе́менным рождество́м Твои́м нетле́нна пребыва́ющи: о Тебе́ бо и естество́ обновля́ется и вре́мя. Те́мже мо́лим Тя, мир гра́ду Твоему́ дарова́ти, и душа́м на́шим ве́лию ми́лость. Кондак: Одея́ние всем ве́рным нетле́ния, Богоблагода́тная Чи́стая, дарова́ла еси́, свяще́нную ри́зу Твою́, е́юже свяще́нное те́ло Твое́ покрыва́ла еси́, покро́ве всех челове́ков, ея́же положе́ние пра́зднуем любо́вию, и вопие́м со стра́хом Ти́, Чи́стая: ра́дуйся, Де́во, христиа́н похвало́. Молитва: О, Преблагослове́нная Де́во, Влады́чице Богоро́дице, зрим ны́не зало́г Твои́х ми́лостей к ро́ду христиа́нскому и све́тло пра́зднуем днесь честны́я Твоея́ Ри́зы положе́ние, я́ко благоволи́ла еси́ в сей Ри́зе яви́ти нам та́йну благода́тныя по́мощи и заступле́ния всем благогове́йно к Тебе́ прибега́ющим и сердца́ свои́ пред ико́ною Твое́ю в моли́тве излива́ющим. Приими́, Всеблагомо́щная Влады́чице Богороди́тельнице, сия́ да́ры, Тебе́ Еди́ной прикла́дныя, от нас, недосто́йных раб Твои́х, от всех родо́в избра́нная, всех тва́рей небе́сных и земны́х вы́сшая я́вльшаяся. И ны́не, Всепе́тая Пресвята́я Богоро́дице, не преста́й моля́щися о нас, е́же изба́витися нам от вся́каго обстоя́ния и наве́та злых челове́к Ри́зою Твое́ю, и сохрани́тися нам неврежде́нным от вся́каго ядови́таго прило́га вра́жия си́лою моли́тв Твои́х, я́ко да Твои́м засту́плением и благода́тною по́мощию спаса́еми, сла́ву, хвалу́, благодаре́ние и поклоне́ние за вся в Тро́ице Еди́ному Бо́гу и всех Созда́телю возсыла́ем ны́не и при́сно и во ве́ки веко́в. Ами́нь. Величание: Велича́ем Тя, Пресвята́я Де́во, Богоизбра́нная Отрокови́це, и чтим святы́я ри́зы Твоея́ честно́е положе́ние.