СВЯЩЕННОМУЧЕНИК ИЕРЕЙ КОНСТАНТИН ВЕРЕЦКИЙ.

Тропарь: Зако́на Бо́жия учи́телю и за́поведей ева́нгельских ве́рный исполни́телю, священному́чениче Константи́не, му́ченичества кровьми́ зе́млю Донскýю ороси́л еси, темже моли́твами твои́ми в лю́дех любо́вь к Це́ркви Христо́вой возрасти́ и в житии́ доброде́тельнем утверди́. Ин тропарь: Зако́на Бо́жия учи́телю, в житии́ исполни́телем сего́ яви́лся еси́, священноиспове́дниче Константи́не, дре́вним му́ченикам за ве́ру поревнова́в и кровми́ страда́ний свои́х зе́млю Донску́ю ороси́в, возрасти́ в ней моли́твами твои́ми, в лю́дех к Це́ркве Христо́вой и Оте́честву любо́вь, и жития́ доброде́тельнаго преумноже́ние. Кондак: Равноапо́стольному царю́ тезоимени́тый, постоя́нство в ве́ре Христу́ дáже до сме́рти яви́л еси́, те́мже и нам, на моли́твы твоя́ упова́ющим, тве́рдое стоя́ние в ве́ре испроси́ и душа́м на́шим ве́лию ми́лость. Ин кондак: Постоя́нию и сто́йкости тезоимени́тый, доброде́тельный приме́р ве́рности Христу́ да́же до сме́рти яви́л еси́, тем же и всем на моли́твы твои́ упова́ющим, тве́рдаго стоя́ния в ве́ре испроси́, и душа́м на́шим ве́лия ми́лости. Молитва: О, преблажéнне о́тче Константи́не, преслáвный уго́дниче Бо́жий, до́брый пáстырю Росто́вский и пе́рвым мýчеником Це́ркве Христо́вой подражáтелю! Ты во дни безбо́жия и поругáния святы́нь Отéчества нáшего достослáвный примéр пáстырскаго свиде́тельства о Христе́ Воскре́сшем яви́л еси́, нéмощем наро́да сострадáя, грехи́ и отступлéния обличáл еси и о спасении стáда Христо́ва ревновáл еси́. Сего́ ра́ди, я́ко а́гнец незло́бивый, на страдáния потéкл еси и, прии́м я, ны́не в невечéрнем Све́те Победи́теля смéрти пребывáеши. О, священному́чениче пресла́вне! Испроси́ у Го́спода ми́р Отéчеству нáшему, лю́дем его́ – дрýг ко дрýгу любо́вь, святи́телем и пáстырем – благоговéние и рéвность в служéнии, властéм предержáщим – благо́е о наро́де попече́ние, учáщим – мýдрость и терпе́ние, учáщимся – кро́тость и вразумлéние, де́вам и ю́ношам – целомýдрие, супру́гам – ве́рность и о ча́дех благода́ть и коемýждо по прошéнию – по́мощь в де́лех, я́же ко спасéнию, да, благодаря́ще тя, прослáвим ди́внаго во святы́х Свои́х Еди́наго поклоня́емаго Бо́га, Отца́ и Сы́на и Свята́го Ду́ха, во ве́ки веко́в. Ами́нь.